La Feria del Libro de Xixón enllena de cultura Begoña y la cai Tomás y Valiente

Del xueves al domingu celébrase la sesta edición de la Feria del Libro de Xixón (FeLiX), que supera un añu más el so récor de participación. Les 57 casetes instalaes en Begoña y la cai Tomás y Valiente van acoyer los puestos de venta, mentes que van entamase actividaes nes dos carpes instalaes, na Escuela de Comerciu y nel Antiguu Institutu.

La lliteratura toma Xixón estos díes gracies a FeLiX, con una importante presencia de la fecha en llingua asturiana. Cuatro Gotes, Delallama, Radagast, Trabe, Picu Urriellu, Impronta, Hoja de Lata, KRK, La Cruz, Pintar-pintar o Trea van tar na feria xixonesa colos sos títulos n’asturianu.

Van entamase actividaes de poesía na estaya ‘Poétiques’, como’l centráu nel llibru ‘Amor y deséu en tiempos virales’ (Ediciones Pata Negra) de María Esther García López (mañana 20.30 hores, Escuela de Comerciu), en ‘Pexe les manes’ (Ediciones Trabe) de Milio Ureta (domingu 17.15 hores, Escuela de Comerciu) y en ‘Tayu’ (Ediciones Trabe) de Alejandro Fernández-Osorio (domingu 19 hores, carpa 1). Tamién dellos alderiques en ‘Disidencies/Identidá’: el de Pablo Rodríguez Medina con Aitana Castaño (sábadu 12 hores, carpa 1) y la so obra ‘Coses nuestres’ (La Cuenca del Nalón); el centráu en ‘¡Volved las manos al bable! La llingua asturiana nel franquismu’ (Ediciones Trabe) d’Inaciu Galán, que va interactuar con Marta Mori (domingu 13 hores, Escuela de Comerciu); el que va xirar alredor de ‘La fuercia o les cuatro epifaníes de Martín Feito’ (Hoja de Lata) de Xaime Martínez, que va falar con Alejandro Basteiro (domingu 18 hores, patiu del Antiguu Institutu); y el que tien como exa ‘El fervinchu’ (Impronta) de Sidoro Villa, con charra xunto con Carlos González Espina (domingu a les 19.45 hores, carpa 2).

Ún de los actos centrales de la feria va ser la presentación de ‘Fortuna’ (VTP Editorial), de Milio Rodríguez Cueto, obra ganadora del I Premiu de Novela Curtia Andrés Solar Santurio. Va celebrase’l domingu a les 19.45 hores na Escuela de Comerciu, actu que va tar conducíu por Paz Fonticiella.

L’horariu d’apertura de les carpes, asitiaes nel paséu de Begoña y na cai Tomás y Valiente, va ser de 11 a 14.30 y de 17 a 21.30 hores, de xueves a sábadu, y de 11 a 14.30 y de 17 a 20 hores, el domingu.

Na semeya, la cai Tomás y Valiente, que na tarde d'ayeri yá tenía instalaos los puestos.