La esposición ‘Voces’ aporta a Xixón

El patiu del Centru de Cultura Antiguu Institutu va acoyer a partir del 13 d’agostu, y hasta’l día 29, la esposición itineraria ‘Voces. La llingua n’Asturies al traviés de los sieglos’. Ésta fai un percorríu pela historia cultural y social d’Asturies al traviés del llinguaxe.

Formada por paneles triangulares y dellos espositores con materiales, ‘Voces’ nació con motivu del programa 'Cuadonga Centenarios', recibiendo más de 5.000 visitantes nel uvieín Muséu Arqueolóxicu d’Asturies. La Casa la Cultura María Xosefa Canellada, en Santolaya, y la Facultá de Filosofía y Lletres de la Universidá d’Uviéu, tamién n’Uviéu, foron les sos siguientes paraes, tando agora abierta al públicu na Casa de la Cultura Palaciu d’Oumaña, en Cangas del Narcea, mientres la celebración de la Universidá Asturiana de Branu (UABRA).

D’ehi va viaxar a Xixón pa instalase nel Antiguu Institutu cola fin de permitir a xixoneses y turistes conocer esta esposición sobre la historia d’Asturies al traviés del llinguaxe, dende la prehistoria hasta los nuesos díes, coordinada por Xulio Viejo, responsable de los conteníos espositivos xunto con Ramón d’Andrés y Roberto González-Quevedo. Esiste la posibilidá de participar tamién en visites guiaes, de baldre, los díes siguientes: miércoles 14 (11 hores), miércoles 21 (18 hores), vienres 23 (11 hores) y miércoles 28 (18 hores).

El máximu de persones en cada grupu ye de 15, polo que ye necesariu acutar plaza pa participar. Pa ello han de poneses en contautu cola Oficina de Normalización Llingüística al traviés del corréu electrónicu llinguaasturiana@xixon.es.

Na semeya, la esposición nel so pasu pel Muséu Arqueolóxicu d'Asturies.