La décima edición de Cantar Presta Muncho amplía la participación

Los ‘Conciertos de Primavera’ de la iniciativa Cantar Presta Muncho de coros escolares coordinada por Nacho Fonseca arrancaron esti martes cola vista pendiente na gran actuación del Teatru Xovellanos. Esta edición, la décima, amplía de 8 a 12 los colexos participantes, axuntando a cuasi 400 escolines y escolinos.

El Príncipe de Asturias, el San Lorenzo, el Río Piles, La Escuelona, el Tremañes y el Clarín son los centros nuevos n’incorporase a esta prestosa actividá de la Oficina Normalización Llingüística destinada pa los centros de Primaria del conceyu que busca “averar a les escolines y escolinos de Xixón a la música coral d’una manera cenciella, abierta, activa y participativa”. Cáense con respeuto al añu pasáu’l Ramón de Campoamor y el Federico García Lorca.

L’Atenéu de La Calzada acoyó esta mañana los primeros conciertos d’esta iniciativa na que los maestros lleven trabayando tol añu cola ayuda de Fonseca. Na xornada participaron el Rey Pelayo, el Príncipe de Asturias, el Santa Olaya y el Cabueñes interpretando cantares como ‘Carretera d’Avilés’, ‘Rock del violinista’, ‘La sacavera’ o ‘Nun nos gusten les lenteyes’.

Mañana, a les 10.30 hores nel salón d’actos del Centru de Cultura Antiguu Institutu, tamién con entrada llibre, va ser el turnu del San Lorenzo, del Laviada, de La Milagrosa y del Río Piles. Al día siguiente, a la mesma hora, van cantar les escolines y escolinos de La Escuelona, del Gaspar Melchor de Xovellanos, del Tremañes y del Clarín.

La gran cita, el 4 de xunu

El conciertu escolar que remata l’añu va tener llugar el domingu 4 de xunu, como ye vezu, nel incomparable marcu del Teatru Xovellanos. Les actuaciones van repartise en dos sesiones: pela mañana, a les 12, van xubir a les tables les alumnes y alumnos del Rey Pelayo, Santa Olaya, Príncipe de Asturias, Cabueñes, San Lorenzo y La Milagrosa, mentes que pela tarda, dende les 17 hores, van facelo los de Laviada, Ríos Piles, La Escuelona, Tremañes, Gaspar Melchor de Xovellanos y Clarín.

Na imaxe, María Xosé Rodríguez López, responsable de la Oficinal de Normalización Llingüística; Manuel Ángel Vallina, conceyal de Cultura; Nacho Fonseca, coordinador de Cantar Presta Muncho; y Miguel Barrero, direutor de la Fundación Municipal de Cultura, Educación y Universidá Popular, na presentación de los conciertos celebrada ayeri nel Antiguu Institutu. Semeya propiedá de la Oficina de Normalización Llingüística de Xixón.