La crisis sanitaria sigue afeutando a los eventos del branu xixonés

|
Restallón

A la suspensión de Nueche de los Fueos, y a la esperada de la Danza Prima y el Restallón, van sumase otros eventos del branu xixonés. Ye’l casu de la versión alternativa del Tsunami Xixón, ensin permisu de la Conseyería de Salú; de la Cómic Con de Metrópoli; o de la CometCon, que se reiventa tres nun poder usar el Recintu Ferial.

Esta selmana llegaben les primeres informaciones sobre que la Selmana Grande xixonesa, cola Nueche de los Fueos yá anulada, nun va contar como remate, como ye vezu, cola Danza Prima nel Muro y el Restallón. Un 15 d’agostu, Día de Begoña, poro, que va ser diferente esti añu como tantes otres coses marcaes pola crisis sanitaria pola pandemia de COVID-19.

Güei, mentes, anunciábense otres decisiones sobre eventos del branu xixonés, nesti casu entamaos por empreses privaes. La más sorprendente ye la suspensión de la versión alternativa del Tsunami Xixón por decisión del Gobiernu al consideralu de “riesgu altu” cuando’l montaxe de la infraestructura taba yá bien avanzáu.

Dende mañana, cuando diba tocar Carolina Durante y Confeti de Odio, y hasta bien avanzao agostu diben celebrase conciertos en dellos escenarios de la Llaboral y de Xixón, dalgunos de baldre y otros de pagu, con bandes como Desakato, León Benavente, Angelus Apátrida o Ilustres Patilludos. Agora queda suspendida tola programación "hasta avisu nuevu" por una postura que sorprende y indigna a los organizadores, que consideren que cumplen con toles midíes de seguridá.

Dos eventos de cómic

Los dos eventos al rodiu del mundu del cómic programaos esti branu na villa tamién sufren cambios. Nel casu de la CometCon, prevista del 28 al 30 d’agostu nel Recintu Ferial Luis Adaro, nun va poder celebrase por decisión de la Cámara de Comercio de Gijón, que yá tuvo que suspender la Feria Internacional de Muestres d’Asturies (FIDMA), y va reinventase con actividaes culturales d’aforu reducíu per dellos llugares de Xixón nes mesmes feches y del 4 al 6 de setiembre.

Mentes, Metrópoli anunció ayeri que nun va entamar la Cómic Con por nun poder celebrar l’eventu “con totales garantíes sanitaries”. Diba celebrase tamién na Feria del 3 al 6 de setiembre.

Na semeya, el Restallón.

Contador Estadistiques