Javier Fernández vende'l Sporting al grupu mexicanu Orlegi Sports

Finen 28 años de xestión de la familia Fernández nel Sporting. Javier, fíu del que fora máximu aicionista de la entidá y presidente del 1994 al 1997, José, firmó nuna notaría en Madrid la venta al grupu mexicanu Orlegi Sports, propietariu del Santos Laguna y del Atlas de la máxima categoría, que toma les riendes del centenariu club xixonés.

El 28 de xunu del 2022 queda rexistrada como una fecha clave na historia del Sporting, como lo foi'l pasu a Sociedá Anónima Deportiva (SAD) nestes feches del 1992. 30 años depués de que los socios perdieran el control del club, ésti dexa de tener propiedá asturiana pa pasar a manes mexicanes.

Nun se llibra la entidá xixonesa d'una tendencia cada vez más habitual nel fútbol profesional. La nota positiva del alcuerdu ente Orlegi Sport y Javier Fernández, que se cifra nuna cantidá cercana a los 40 millones d'euros, son los ésitos qu'acumula'l grupu inversor mexicanu nos sos proyeutos deportivos, faciendo campeón tanto al Santos Laguna como al Atlas.

La estructura nueva del Sporting va tar presidida por Irarragorri, con Alfonso Villalva y Martin Hollaender como conseyeros. El secretariu va ser José María Segovia.

Los propietarios nuevos convocaron a los medios a una rueda de prensa esta tarde, a les 21.30 hores, n'El Molinón. Ésta va emitise en direuto pola canal del club RSG TV.