Instálense 30 contenedores más pa restos vexetales

EMULSA asítialos de manera estratéxica na zona rural xunto a los 'grises' a pidimientu vecinal.

A los 53 contenedores pa restos de fradadura y siega de la Empresa Municipal de Servicios de Medioambiente Urbanu (EMULSA) esistentes nel conceyu incorpórense agora otros 30 cola intención de facilitar el so usu les vecines y vecinos. D'esta forma amplíase'l proyeutu pilotu completando un distritu de 83 contenedores na zona rural.

"Confiamos en qu'actuaciones como ésta nos permitirán siguir avanzando p'aproximanos a les esixencies marcaes pola normativa europea, que pasen por algamar un 50 por cientu de recoyida separtada", apuntó'l popular José Rodrigo Pintueles, conceyal de Mediu Ambiente y Sostenibilidá y presidente d'EMULSA. "Ún de los exes fundamentales del nuevu Plan Municipal de Residuos, nel que yá trabaya la Conceyalía de Medio Ambiente, pasa por ampliar y desendolcar entá más los programes de recoyíes separtaes esistentes", esplicó.

Residentes de la zona rural y periurbana pueden depositar los sos restos vexetales nestos contenedores específicos, diferenciaos pola so tapa verde escuru y banda marrón, pa depués treslladalos a COXERSA, onde se convierten en compost. Les empreses de xardinería han siguir utilizando los servicios d'un xestor autorizáu o los puntos llimpios.