Iniciativa pol Asturianu reclama “una presencia digna” del idioma nos folletos informativos

La probe presencia del idioma nel programa d’actividaes de les fiestes navidiegues del Conceyu, asina como l’incumplimientu de la toponimia oficial, lleva a Iniciativa pol Asturianu a reclamar un espaciu dignu nos folletos informativos. Llama l’atención tamién sobre la so ausencia na campaña que se ta entamando nes redes municipales.

“El documentu que recueye’l calendariu d’actividaes de la ciudá pa les vinientes selmanes malapenes inclúi información n’asturianu y, na mayoría de los casos, tampoco cumple la toponimia oficial”, esplica la organización. Una ausencia que paez cada vez más habitual y de la que yá informaba YeXixón recién.

Asina, la organización reclama “una presencia normal y digna del idioma nos folletos informativos del Conceyu pa estes fiestes, nos que l’asturianu nun ta presente na campaña en redes del Conceyu nin se cumple la toponimia oficial”. Tamién que, nel futuru, nos otros folletos que s’asoleyen, como les programaciones trimestrales del Teatru Xovellanos, la braniega o la de la Selmana Grande, “l’asturianu y el castellán tean presentes n’igualdá de condiciones, pudiendo sacar el mesmu programa de manera bilingüe”.

“Ésti ye un trabayu que visibiliza l’idioma y normaliza, y amás s’enmarca, dientro del Plan de Normalización del Conceyu de Xixón”, recuerda.

Na imaxe, logu emplegáu nel folletu navidiegu, ensin presencia del topónimu tradicional.