Iniciativa pol Asturianu propón l’usu del idioma na megafonía de los autobuses municipales

El papel importante que xuega la Empresa Municipal de Tresportes (EMTUSA) na normalización del idioma lleva a Iniciativa pol Asturianu a facer delles propuestes a la so xerencia. Asina plantega l’usu de la llingua asturiana na megafonía al tiempu que demanda la so presencia na web y la correición d’un error col nome de la cabecera de la llinia 36.

Ésta xune La Xuvería y la Casa del Mar, pero los autobuses amuesen un topónimu que nun taba nin rexistráu como oficial hasta l’aprobación del decretu de Xixón nel 2006, como ye ‘La Juvería’. “Depués de recibir varios avisos d’usuarios d’esta llinia de tresporte d’EMTUSA, Iniciativa pol Asturianu treslladó esta reclamación al Conceyu; pero entá nun s’iguó”, apunten.

Amás del usu de la toponimia de manera correuta nos paneles, Iniciativa pol Asturianu demanda la presencia del idioma dientro de la propia páxina web d’EMTUSA, “onde na mayoría de los casos sí se cumple la toponimia, pero la presencia del idioma ye nula”. La organización pide un esfuerciu a la empresa pa siguir normalizando l’asturianu d’esta forma y propón l’usu del asturianu “na megafonía interna de los autobuses nos que se dan anuncies de les paraes y otros avisos”.

Nesi sen recuerda “qu’esti sistema ye similar al que se fixo nes playes pa los avisos y a un costu mui pequeñu desendolcóse un bon trabayu de normalización y presencia del idioma”.