Iniciativa pol Asturianu entama un taller básicu de teatru
|
17 Ochobre, 2017 por Redacción
La organización abre la matrícula pa esti cursu que pon el teatreru Sergio Buelga.
El taller de 40 hores qu’entama’l 6 de payares, va desendolcar distintes propuestes pa que, quien participe, puea contar con unes ferramientes básiques pa poder acarar, de forma afayaíza, una creación actoral propia, seya individual o coleutiva.
Les actividaes dirán empobinaes a desendolcar les diferentes téuniques actoralesindividuales (ortofonía y dicción, comprensión de testos, declamación, espresión corporal, improvisación…) y dinámiques coleutives (escenificaciones, improvisación de métodu, dramatizaciones de testu, coru…), deteniéndose a trabayar con exemplos propios del fechu teatral asturianu.
Va ser los llunes de 18 a 20 hores nel espaciu cultural La Manzorga de Xixón (C/Cean Bermúdez, 2) y va tener un preciu de 60€ (50€ pa socios d’Iniciativa pol Asturianu).
Un teatreru nel aula
Sergio Buelga Casas (Xixón, 1979) ye monitor d'ociu y tiempu llibre. Miembru de la Compañía Asturiana de Comedias dende va más de diez años, como actor, ye, dende la última temporada, co-director escénicu. A lo llargo de cinco años desendolcó'l blogue 'Un Teatreru asturianu'. En 2016, estrenóse la so obra 'La máquina de retratar'. Amás tien agamaos como escritor dellos certámenes dramáticos.
