Inauguración de la esposición "Vicente García Oliva: Un paisanu con munchu cuentu"
|
16 Payares, 2016 por Redacción
Vicente García Oliva participó esti martes na inauguración oficial de la esposición fecha por escolinos y escolines sobre la so obra.
L'esposición lleva'l nome de 'Vicente García Oliva: un paisanu con munchu cuentu' y ye una muestra fecha polos alumnos de Llingua Asturiana de los colexos Asturias, Evaristo Valle, Jacinto Benavente, Manuel García Blanco, Ríu Piles, Santa Olaya y el San Lorenzo que repasa la vida y obra de García Oliva, que ye un referente na lliteratura n'asturianu pa neños y mozos.
Quien la visite va conocer y esfrutar con personaxes y obres lliteraries que yá son historia na lliteratura infantil. La bruxa Pumarina y el dragón Maragatu van davos la bienvenida al particular reinu los silentes,nuna amuesa que vien mui a cuentu. Tará abierta al públicu hasta'l día 30 nel xixonés Centru de Cultura Antiguu Institutu nel horariu siguiente: de 9 a 21.30 hores, de llunes a vienres; de 10 a 14 y de 16 a 21 hores, los sábados; y de 10 a 14 hores, los domingos.
L'escritor y académicu acudió a la cita acompañaú de la so familia, eventu nel que tamién participó Fernando Padilla, direutor xeneral de Planificación Llingüística y Normalización; Raquel Huergo Rodríguez, directora de la Fundación Municipal de Cultura y UP; María Xosé Rodríguez López, responsable de la Oficina de Normalización Llingüística; y los tamién académicos Pablo Xuan Manzano y Nacho Fonseca, ente otres autoridaes y collacios. Dellos escolinos lleeron testos de García Oliva y repartióse la guía didáutica de la esposición cola que trabayen los alumnos de Llingua Asturiana del conceyu.
