Gran respuesta ciudadana na movilización polos derechos y llibertaes

"Contra'l fascismu, nin un pasu atrás", esclamen los convocantes de la manifestación contra la entrada de la ultraderecha nel gobiernu.

"Fermosa y esitosa", definíen la movilización baxo'l lema 'Nin un pasu atrás. Pola defensa de los nuesos drechos y llibertaes' al final de la mesma. Los coleutivos y organizaciones d'izquierda que llamaron a participar na marcha soprendiéronse pola importante respuesta ciudadana que tuvo una llamada que corrió principlamente ente los xixoneses pel boca a boca o en redes sociales.

Salió de L'Humedal al rodiu les 19 hores y finó na Plaza Mayor una hora depués, onde hebo delles intervenciones que llamaben a tomar les cais pola entrada de la estrema derecha nel gobiernu municipal de la mano de Foro, a la qu'esixíen que frayaren el so alcuerdu con VOX. "Contra'l fascismu, nin un pasu atrás" esclamaron.

Na manifestación, qu'ocupó la práutica totalidá de la cai San Bernardo dende la Plaza Mayor a El Parchís, hebo presencia de sindicatos como la Corriente Sindical d'Izquierda (CSI), el Sindicatu Unitariu Autónomu de Trabayadores de la Enseñanza d'Asturies (SUATEA) o'l Sindicato de Estudiantes, el movimientu feminista 8-M, los pensionistes, ecoloxistes o les trabayadores del SAD, ente otros munchos coleutivos. Tamién hebo representación de partíos políticos como Andecha Astur y Anticapitalistes, y diputaos como Cova Tomé (Podemos) o Xabel Vegas (Convocatoria por Asturies).