Convócase una manifestación "pola defensa de los nuesos drechos y llibertaes"

Coleutivos y organizaciones d'izquierda movilícense pola amenaza que supón la entrada de la ultraderecha nel gobiernu municipal.

La Educación, la Sanidá, la oficialidá, la memoria histórica, les xubilaciones, les pensiones, los servicios públicos, el feminismu, la llucha contra la violencia de xéneru, los derechos LGTBI, el mediu ambiente, la cultura y los derechos llaborales y sociales van ser defendíos esta tarde na cai pola ciudadanía. A les 19 hores ta convocada una manifestación con salida de L'Humedal.

Ésta lleva'l lema 'Nin un pasu atrás. Pola defensa de los nuesos drechos y llibertaes' y ta convocada por coleutivos y organizaciones d'izquierda depués de la entrada de VOX nel gobiernu municipal per aciu del pautu con Foro, conformando un tripartitu xunto col PP. Entienden que la presencia de la ultraderecha nel executivu podría llevar a un retrocesu en toes estes cuestiones, como yá se pudo comprobar cola cuestión llingüística pola confirmación del vetu dende Festexos a artistes qu'empleguen l'asturianu y puedan ser sospechosos de defender la oficialidá.