García Arias va falar de la xunidá cultural de los territorios de fala asturlleonesa

'La nuesa llingua y les tierres al sur' ye'l nome de la conferencia mensual d'Ástura en collaboración col Atenéu Obreru de Xixón. Va encargase de ponela'l doctor en Filoloxía Románica pola Universidá d'Uviéu y primer presidente de l'ALLA, Xosé Lluis Garcia Arias.

La siempre interesante charra sobre cultura asturiana qu'Ástura entama'l tercer martes de cada mes va centrase nesta ocasión nel terrén llingüísticu y va empezar a les 20 hores. Asina, García Arias "encamentará la conveniencia de dir llogrando una conciencia cultural y llingüística nes tierres que foron pertenencia de los pueblos ástures (Asturies, Lleón, noroccidente de Zamora y Miranda de l Douro) qu'entá conserven güei, en dalguna midida, la vieya llingua romance común", espliquen dende l'asociación cultural.

Fundador y presidente de Conceyu Bable, el de Teberga ye una de les persones más influyentes no que se refier al idioma. Asina, tamién foi'l primer presidente de l'Academia de la Llingua Asturiana (ALLA), dende'l 1981 hasta'l 2001. Dende'l 2009 ye caderalgu de Dialeutoloxía na Universidá d'Uviéu y cuenta con una bibliografía estensa, destacando, ente otros, el so 'Diccionario General de la Lengua Asturiana', espublizáu en fascículos por La Nueva España y disponible na rede.