Foro quier recuperar los toros esti mesmu branu

El númberu 2 de la candidatura de Foro a l’Alcaldía, Jesús Martínez Salvador, confirmó que l’enfotu de la formación ye recuperar los toros esti mesmu branu, pa lo que yá ta trabayando nello. La Feria de Begoña nun se celebró l’añu pasáu col argumentu del estáu nel que ta la plaza.

Foro convierte nun compromisu eleutoral la vuelta de los toros a Xixón. Depués d’un conceyu cola Federación de Peñas Taurinas del Principado de Asturias el tamién voceru del partíu en Xixón aseguró que yá ta avanzáu un estudiu pa la reapertura de la plaza, pesllada a cualquier actividá dende l’añu pasáu, con una pequeña mengua d’aforu.

Asturies, que ta llibre d’eventos taurinos nestos momentos, sacante la iniciativa privada de Benia del añu pasáu nuna plaza portátil instalada pa la ocasión, volvería a contar con una feria, la única que se celebraba nel país. L’equipu de gobiernu municipal del PSOE y Xixón pela Izquierda (IX-IAS) decidiera l’añu pasáu nun conceder la prórroga d’usu d’El Bibio a la empresa Circuitos Taurinos, encargada d’organizar la Feria de Begoña, pol estáu nel que ta la plaza, con riesgu de fundimientu del ‘tendido’.

Na semeya, un momentu de la última Feria de Begoña, celebrada nel 2021.