Fernando González presenta'l llibru que cuenta la so participación nel Tor des Glaciers

Entitúlase '10.306' pol númberu de minutos nos que completó la carrera pelos Alpes.

"Una aventura en mayúscules", asina definió la so esperiencia nel nel Tor des Glaciers Fernando González Rodríguez a Asturies.com en marzu del 2020, nel momentu nel que s'entraba nel estáu d'alarma. Una situación qu'atrasó les presentaciones previstes d'esti llibru billingüe asturianu-castellanu.

En Xixón, ciudá del deportista, va facese esti vienres, a les 19 hores, nel estragal de la segunda planta de la vieya Escuela de Comercia, con aforu llendáu a 30 persones por protocolu de seguranza COVID-19. Los asistentes han de dar los sos datos a la entrada.

Carrera d'una selmana

Siete díes, 3 hores y 46 minutos foi’l tiempu que-y llevó a González el percorrer los 450 quilómetros nel Val d'Outa del Tor des Glaciers, prueba entamada per primer vegada en setiembre del 2019 con motivu del décimu aniversariu de la organización del Tor des Géants, prueba de 330 quilómetros. Ente medies, el pasu de 47 collaes alpines, 8 d’elles perriba de los 3.000 metros, y más de 70.000 metros de desnivel acumuláu.

Nel llibru, González cuenta tola carrera, "la más dura a la que m’enfrenté hasta’l momentu", dende qu'algamó la inscripción, los preparativos, el viaxe y les vivencies na competición.