Esplublizada la convocotaria d'ayudes pa les fiestes de barrios y parroquies

Esti sofitu económicu ta empobináu a favorecer la promoción, el caltenimientu, el respetu y la proteición de les muestres llocales de la cultura popular tradicional.

Divertia Gijón espubliza güei la convocatoria que tien por oxetu la concesión d’ayudes económiques a les asociaciones de vecinos y entidaes ensin ánimo d’arriquecimientu qu’entamen les fiestes en barrios y parroquies nel Conceyu de Xixón a lo llargo de 2017.

Al efeutu d’esta convocatoria, considérense tanto les fiestes de prau tradicionales de les parroquies rurales y les de los barrios urbanos o periurnanos qu’amuesen un programa d’actividaes de, como mínimu, dos díes y nel que s’inxere la fiesta que se conmemora conforme al calendariu llitúrxicu ya históricu. Tamién van tomase en consideración les fiestes que se programen en barrios de creación nueva con un calter asemeyáu a les anteriores.

Les ayudes van destinase, preferentemente, a les fiestes que, como norma xeneral, inxeran elementos que formen parte de la tradición cultural y festiva asturiana, que contengan programes qu’amuesen delles formes de cultura tradicional llocal o asturiana y que potencien l’interés turísticu. Amás, va tener en cuenta qu’empleguen la llingua asturiana y qu’incluyan actividaes pa que los más pequeños conozan y perciban la cultura llocal nes sos muestres diverses. Pa ello, ta prevista una cuantía total pal añu 2017 de 60.000 euros, que va distribuyise ente les entidaes solicitantes y almitíes, d’acordies cola puntuación algamada. L’ayuda nun superará, en nengún casu, el coste de l’actividá y afitaráse ente 600€ y 2.500€.

La solicitú tien de presentase na sede de Divertia Gijón SA (Casa de la Palmera, departamentu de Festexos. Cai Cabrales, 82. 33201 Gijón/Xixón) de 10:00 a 14:00h enantes del 31 de marzu d’esti añu. Les bases completes de la convocatoria pueden consultase na páxina de festexos del Conceyu de Xixón.