Ésitu de participación nel IV Día de la Reciella

|
Ésitu de participación nel IV Día de la Reciella

Más de mil persones disfrutaron el domingu nel Muséu del Pueblu d’Asturies  de les actividaes organizaes pol IV Día de la Reciella.

Dende l'asociación "Reciella. Families pol Asturianu” mostráronse encantaos cola participación nesta xornada. 

Les actividaes entamaron a les once de la mañana cola celebración de “Entaína, I Carrera de families pol asturianu” onde cuasi 200 persones de toles edaes participaron nuna carrera que quier reconocer la tresmisión xeneracional del nuesu idioma. Dempués  continuó cola exhibición de fútbol a cargu de la escuela del U.C. Ceares, el partíu foi retrasmitíu n’asturianu por Nacio González. Les actividaes de la mañana continuaron con xuegos tradiciones cola collaboración de la Tertulia Cultural El Garrapiellu, talleres de llambiotaes por Miel et canelle y xuguetes con material reclicao por EMULSA,  y cuentacuentos con Olga Cuervo.

Na tarde continuaron los cuentacuentos con “Samalandran, Islla de lleendes” y talleres cola Asociación Apasos. Amás d’otres actividaes pel práu del Tendayu del Pueblu d’Asturies. La música llegó cola actuación de la Banda de Gaites Infantil de Villaviciosa y la Escuela de Música Tradicional de Ribeseya. Les actividaes finaron col conciertu de “Bestiariu” y una Danza Prima.

En resumen, un Día de la Reciella cargáu d’actividaes pa tola familia que medra añu a añu. “Tolos talleres escosaron les sos places a lo poco d’abrir la inscripción ”, espliquen dende Reciella, que quier “agradecer a tola xente de l'asociación y collaboradores que participaron na organización y a los patrocinadores el so apoyu pa que saliera perbien esta folixa que tien como oxetivu la socialización n'asturianu de les xeneraciones nueves”.

Contador Estadistiques