El XIII DocuXixón presenta trés títulos

Esta edición va desenvolvese dafechu nel salón d'actos de la Escuela de Comerciu.

Yá ta equí una edición nueva de DocuXixón, la decimotercera d'esti ciclu de proyeición de documentales que da una importancia especial a les producciones feches n'Asturies. Prográmense un total de trés sesiones ente güei y el sábadu, siempre a les 19 hores.

Na primer xornada, esta tarde, el públicu asistente, con accesu de baldre, va poder ver 'A mano armada', d'Omar Tuero, "un testimoniu de dureza de la vida n'Asturies nos años posteriores al final de la Guerra Civil, onde munchos soldaos republicanos siguían lluchando como guerrilleros". Mañana'l turnu va ser pa 'Los años eléctricos', de José Braña y Chus Neira, una serie documental "sobre lo que foi, ye y podría ser la escena musical n'Asturies dende los años 70 hasta'l 2005 al traviés de recuerdos y reflexones de dellos protagonistes d'esta historia".

Va poner el ramu a esti eventu, entamáu pol Departamentu d'Innovación Cultural-Centru d'Imaxe de la Fundación Municipal de Cultura, Educación y Universidá Popular, 'McQueen', cinta británica del 2018 dirixida por Ian Bonhôte y Peter Ettedgui, sobre la historia de 'Lee' Alexander McQueen, "un rapaz probe de clase obrera del este de Londres qu'aprovechó los sos demonios y se convirtió nuna marca mundial de moda y ún de los artistes más icónicos del sieglu". Esta proyeición forma tamién parte de la programación de Día Mundial de Texer en Públicu.