El Villa de Xixón trai bandes de gaites procedentes d'Asturies, Galicia y Breizh

Na Folixa Intercéltica tamién destaca la presencia del grupu escocés Project Smok y d'Anxo Lorenzo Band dende Galicia.

Un añu más, el Festival de Bandes de Gaites Villa de Xixón torna fiel a la so cita col branu xixonés. La Banda de Gaites Villa de Jovellanos interpretó ayeri los primeros sones de la decimonovena edición del certame en Begoña y mañana, a les 19.30 hores na plaza Italia, va garrar el relevu la Banda de Gaitas Infantil Magüeta.

El xueves y el vienres van desendolcase los dos platos fuertes del festival. A les 14 hores va entamase nel tendayu del Muséu del Pueblu d'Asturies una Folixa Intercéltica, que va contar con una espicha, un taller de baille, de la maxa de Pablo Picallo y de les actuaciones Anxo Lorenzo Band y de Project Smok, amás de bandes de gaites.

A les 18 hores van tocar en dellos puntos de la ciudá l'Arvorig Breizh Band (Begoña), que repite nel Villa de Xixón, y los sos paisanos de la Bagad de Vannes Melinerion (plaza'l Marqués) y los gallegos Banda de Gaitas Xinzo de Limia (Xardinos de la Reina).

Plaza Mayor

El gran espectáculu na Plaza Mayor ta programáu pal vienres a les 21.15 hores cola participación de la banda gallega y les dos bretones, amás de la Teixo-Manolo Quirós y de la Banda de Gaitas Villa de Xixón, organizadora del festival. Enantes, a les 19 hores, van tocar estes formaciones na plaza del Seis d'agostu (Arvorig Breizh Band), El Parchís (Teixu-Manolo Quirós), Italia (Xinzo de Limia), Xardinos de la Reina (Vannes) y El Náutico (Villa de Xixón).

Na semeya, actuación d'ayeri de la Banda de Gaites Villa de Jovellanos en Begoña.