El Villa de Xixón de bandes de gaites garantiza la so continuidá

El Conceyu comprometióse esti miércoles cola Banda de Gaites Villa de Xixón, qu’anunció que va recurrir la multa recibida por tocar na cai, pa sofitar el so festival internacional de bandes de gaites. Ésti va celebrase ente’l 31 de xunetu y el 4 d’agostu con formaciones de cuatro países.

El conceyal de Turismu, Deportes, Fiestes y Mocedá, Jesús Martínez Salvador, comprometióse ayeri, tres la protesta na Plaza Mayor, en sofitar económicamente’l festival de la banda de gaites con ente 17.000 y 20.000 euros, lo qu’asegura la viabilidá del certame. “L’añu pasáu recibimos 10.000 euros, 8.000 de Cultura y 2.000 de Divertia. El presupuestu foi de 24.000 euros que cubrimos con fondos propios y patrocinadores con munchu esfuerciu”, rellata García Díaz.

El compromisu del gobiernu municipal de Foro ye que, como pretendía la Banda de Gaites Villa de Xixón, Divertia tenga una partida tolos años pal Festival Internacional de Bandas de Gaitas Villa de Xixón con toles actuaciones de baldre, na cai, y con presencia de formaciones de nivel de fuera d’Asturies. “Esti añu va celebrase ente’l 31 de xunetu y el 4 d’agostu y va haber representación d’Escocia, Bretaña, Galicia y Asturies”, apuntó’l direutor de la formación, que destaca l’activu que supón el mesmu pa la ciudá.

Multa de 200 euros

A les 19.30 hores del martes, cuando 25 componentes de la banda taba tocando na plaza Arturo Arias, nel barriu xixonés de Cimavilla, pa una espicha entamada por un establecimientu hosteleru del llugar –nun contaba con llicencia pa esta celebración– que contratara a la banda de gaites, axentes de la Policía Llocal procedieron a multar García Díaz y al presidente de la formación, Borja Álvarez, con 200 euros caún por “pertubar el descanso y la tranquilidad de los vecinos y viandantes mediante música en la calle, en espacios y horarios no habilitados especialmente para ello”. “Vamos recurrir la multa”, afirma García Díaz, qu’añade que “nun s’entiende que te multen por tocar na cai. Tamos sorprendíos”.

Nesi sen, recuerda les decenes d’actuaciones que tienen programaes pa tocar en bodes o n’otros llugares públicos, o la concentración que tuvo llugar ayeri na Plaza Mayor pa protestar pola falta de compromisu del Conceyu col Festival Internacional de Bandas de Gaitas Villa de Xixón, na que “tocamos mientres cuatro minutos y nun pasó nada”.

Nun prestó tampoco l’actitú del conceyal de Seguridá Ciudada, Movilidá y Tresporte, qu’en redes sociales llegó a afirmar que “la legge è uguale per tutti”, al que’l direutor retrucó ayeri na so intervención nel Plenu citando a Xovellanos: “No ha menester que el Gobierno le divierta, pero sí que le deje divertirse”.

La nota positiva del asuntu foi la solidaridá que recibió de la banda de gaites xixonesa, “con mensaxes de delles partes del mundu”. Inclusive, una muyer de Cimavilla llegó a recoyer 1.500 firmes en poques hores “qu’entregó en mano a l’alcaldesa”.