El VIII Festival Arcu Atlánticu da visibilidá a les muyeres

'Muyeres (in)VISIBLES’ ye’l nome que lleva'l VIII Festival Arcu Atlánticu, que se va allargar mientres seis díes. Les muyeres van ser, poro, protagonistes d'esta edición de certame que va llevar a los sos escenarios a formaciones como Muyeres, L-R, los asturbretones Muga o les occitanes La Mal Coiffée, ente otros munchos.

El fin de xira del espactáculu 'País malva', a cargu de Muyeres Asocaciación de Música Tradicional, va abrir a les 22 hores de güei l'Arcu Atlánticu na Plaza Mayor. Pa ello, esti coleutivu tien preparáu un conciertu especial que va contar coles collaboraciones de Marisa Valle Roso, Morgane Le Cuff (Breizh), Vanesa Muela (Castilla), Tanxugueiras (Galicia) y Las Çarandas (Miranda de l Douro).

El restu de conciertos nel escenariu principal del festival son los siguientes: La Mal Coiffée, mañana; B-Linda, el xueves; Anabel Santiago, el vienres; L-R cola propuesta ‘Amigues’ na que van participar Valle Roso, Mapi Quintana, Andrea Joglar, Merce Santos, Silvia Quesada, Marga Lorences, Eva Tejedor, y 6 Riales, amás de Prau Llerón con bailles a pie de cai, el sábadu; y la Banda de Música de Xixón, el domingu. A ellos hai que sumar otros munchos en distintos puntos de Cimavilla o nel Antiguu Institutu, como'l de Muga, formación d'An Oriant liderada pola asturiana Clara Diez Márquez, que trai per primer vegada l'espectáculu ‘Chants de femmes des Asturies’ (vienres 20.30 hores, Antiguu Institutu).

Pero l'Arcu Atlánticu nun ye sólo música, tamién ufre esposiciones, conferencies, alderiques, talleres, espectáculos de danza y teatru, y exhibiciones deportives qu'esti añu tienen como suxetu principal a les muyeres.