El Sporting yá ye equipu de Segunda
|
15 Mayu, 2017 por Redacción
Los resultaos de los sos rivales pola permanencia nun-y permitieron siguir suañando hasta la última xornada. El Sporting B llogró'l campeonatu de Tercera, y confirmaron el so ascensu dende preferente’l Roces y l’UD Gijón Industrial.
El Sporting fixo los deberes ayeri n’Ipurua nun bon partíu de los de Rubi pese a unos malos primeros minutos. Burgui anotó nel minutu 32, tres una bona asistencia de Moi Gómez, el tantu roxiblancu que, nesi momentu, daba opciones de permanencia al cuadru xixonés al dir ganando l’Athletic Club 1-0 al Leganés.
Pese a que l’Eibar tuvo ocasiones, les más clares foron les sportinguistes, sobre manera un remate de Cop en boca de gol a centru de Sergio dende la derecha que salió desviada por poco. Sicasí, el tantu d’Alexander Szymanowsky en San Mamés nel minutu 61 condenaba a los roxiblancos.
Un disparu al palu del futbolista xixonés Cristian Rivera nel minutu 74 foi l’únicu sustu que tuvo una ayeri segura defensa sportinguista. Sicasí, el silenciu de la esquina visitante y del restu d’afición asturiana repartida per too Ipurua, facía saber a los xugadores el desenllaz final de la tarde: l’empate del Leganés en Bilbao y del Deportivo nel Estadio de la Cerámica dexaben al Sporting ensin opciones de permanencia a falta d’una xornada pal final.
El descensu roxiblancu provocó cambios nel horariu de dicha xornada por parte de LaLiga. El Sporting-Betis caltién la hora (17, El Molinón), mentes que’l Leganés-Alavés y el Deportivo-Las Palmas pasen a disputase a les 19 hores.
Tercera
Esta xornada confirmo'l ascensu a Tercera del Roces y del UD Gijón Industrial. División de la ye yá yera campeón dende la selmana pasada'l Sporting B.
