El Sporting viose superáu pol Atlético na final de la Copa de Campeones

Los d'Isma Piñera van buscar na revancha na Copa del Rei, cola Real Sociedad como primer rival. El filial del Sporting va lluchar pol ascensu a Segunda División A al empatar n'Irun (1-1).

L'equipu xuvenil del Sporting morrió na oriella y vio como l'Atlético llevantaba la Copa de Campeones en Ciudad Real. El gol colchoneru nel minutu 33, tres recoyer Borja un balón sueltu na área tres una gran parada de Cristian Joel a disparu de Joaquín, supunxo un mazazu pa los d'Isma Piñera, que salieron bien el partíu.

Los madrilanos comenzaron a mandar nel choque y, al poco de comenzar el segundu tiempu, nel 52, Andy facía'l segundu. Un llibre direutu de Sandoval nel 62 metía otra vuelta al Sporting nel partíu, pero sentenciaría Óscar diez minutos depués pa dar al Atléticu la so segunda Copa de Campeones tres la ganada nel 2002.

El Sporting, campeón nel 2004, suma asina'l so segundu subcampeonatu, posición que nun da plaza pa la Lliga Moza de la UEFA, a la que va direutamente'l club madrilanu al xugar el so equipu profesional la Lliga de Campeones. La plaza que sería pa la federación española pasa a ser ocupada pol ganador d'otru estáu que nun cuenta con conxuntos na máxima competición continental.

Los d'Isma van buscar la revencha na Copa del Rei, competición que comienza esta fin de selmana y que tien al Madrid como campeón actual. El Sporting va enfrentase n'octavos de final cola Real Sociedad, segundu clasificáu del grupu 2 detrás del Athletic Club, siendo'l partíu d'ida en Mareo.

El restu d'eliminatories son les siguientes: Deportivo-Athletic Club, Las Palmas-Atlético, Tenerife-Rayo, Atlético Madrileño-San Félix, Valencia-Málaga, Barcelona-Betis y Zaragoza-Madrid.

A la espera d'un pinchazu del Mirandés

Na categoría de bronce del fútbol estatal, el Sporting B nun aprovechó l'empate del Mirandés na so visita al Arenas (1-1) y namái pudo rescatar un puntu n'Irún col Real Unión (1-1) gracies a un tantu de Claver nel minutu 87.

D'esta manera los de José Alberto siguen en segunda posición a un puntu de los burgaleses a falta d'una sola xornada pal final. Los xixoneses han de ganar precisamente al equipu de Getxo, partíu que se va xugar el domingu a les seis de la tarde n'El Molinón (horariu unificáu), y esperar que'l Mirandés nun sume los trés puntos n'Anduva contra'l Gernika.

Por mor de tener ganáu la diferencia particular de goles, al Sporting B tamién-y podría valir l'empate si'l conxuntu vascu gana en Mirada de Ebro. A la espeutiva va tar la Real Sociedad B, terceru, que necesitaría ganar al Peña Sport en Tafalla y un doble fallu d'asturianos y castellanos.

La cuarta plaza ocúpala l'Athletic Club B, con trés puntos de ventaya col Real Racing Club, que perdió gran parte de les sos opciones d'ascensu en Zubieta (3-0), derrota que llevó al so presidente, Manuel Higuera, a dimitir xunto a cuatro conseyeros.