El Sporting repite los mesmos errores qu'en derbis anteriores

Un derbi más nel que se repite la mesma historia. L'Uviéu, qu'acumulaba 7 partíos ensin ganar, realcontróse cola victoria n'El Molinón con un gol de Diegui énte un Sporting que volvió a ufrir la mala imaxe de cites anteriores, defraudando otra vez más a l'afición.

Aitor foi'l primeru n'avisar nel choque, pero un centru llateral de Lucas, el sábadu na izquierda, tocólu l'internacional islandés énte la pasividá de Valiente, Mariño y Saúl García. Poníase-y el partíu al Uviéu como quería, conxuntu que defendería con munchu orde'l resultáu hasta'l pitíu final.

Inclusive pudo meter el segundu nunca contra tres un córner, pero Nahuel crució demasiao énte'l porteru gallegu del Sporting. Per parte llocal, posesión estéril, nula creación y dos ocasiones, un tiru de Manu centráu que mandó Femenías a córner y un remate d'Aitor, yá na segunda parte, que sacó nuna maniobra acrobática Arribas, col guardamenta vencíu, cuando paecía que'l balón embocaba puerta.

Al final, allegría ente la plantía azul y la so afición, que tuvo que ver el partíu pela televisión al celebrase, per tercer ocasión, el derbi ensin públicu. Los de Ziganda, téunicu qu'acumula esos trés partíos como téunicu en derbis, toos con trunfu, foron más intensos que los roxiblancos, incapaces de someter a un rival que venía col agua al pescuezu.

El Sporting, entovía en posiciones de puestos d'eliminatories d'ascensu, engancha trés derrotes siguíes nel peor momentu, col Girona –rival próximu del Uviéu'l sábadu nel Tartiere (14 hores, Movistar LaLiga)– acercándose peligrosamente, y con La Romareda esti vienres (21 hores, GOL) como destín próximu.