El Sporting nun tira a puerta en Riazor

Baraja foi a por un puntu a A Coruña y tornó ensin nengún por un gol del Deportivo nel 93.

El Sporting finó'l so compromisu lligueru en Riazor ensin disparar a puerta, un datu que nin los más vieyos del llugar recuerden. Amás, pagó cara la so falta d'ambición al perder el puntu pol que lluchó nel campu coruñés al ver como'l central Pablo Marí remataba ensin oposición un centru dende la derecha na que se presumía como xugada cabera del partíu.

Nesi momentu'l conxuntu xixonés taba con diez pola espulsión de Cofie nel 75 por doble mariella, la primera por protestar un penalti de Babin inventáu pol colexáu Gorka Sagués Oscoz que detuvo Mariño. Nesa mesma xugada que dexaba al Sporting con ún menos, el téunicu Rubén Baraja reclamó en rueda de prensa que'l balón saliera de banda.

Lo cierto ye que los xixoneses merecieron tornar de vacío d'A Coruña pol so plantegamientu conservador y la falta de llegada, pese a que'l Deportivo nunca inquietó con peligru real la portería de Mariño hasta'l gol nel tiempu añadíu.