El Sporting nun da bones sensaciones pal arranque de la competición lliguera

Entama la Segunda División en Valladolid con duldes na configuración de la plantía.

A les 21.30 hores d'esta nueche va arrancar el proyeutu 2023-2024 del Sporting, un proyeutu entovía a mediu facer. Cuenta Miguel Ángel Ramírez pal debut con 7 baxes, les últimes les d'Izquierdoz y Villaba, y falten-y pieces por encaxar.

Per boca del canariu solicitóse un central, que ta cerca de llegar depués de retomase la negociación cola Ponferradina por Pascanu cola lesión de llarga duración de Bamba, y un delanteru. Nun se citó'l posible refuerzu del mediocampu d'un perfil asemeyáu a Pedro Díaz, vendíu al Girondins, magar que paez una necesidá obvia.

Lo cierto ye que pa Zorrilla ye posible que salga con un descarte, Rivera, y el canteranu Nacho Martín, con Varane na enfermería y Nacho Méndez nel bancu. Poques opciones más hai, sacante retrasar la posición d'un Villaba tamién ausente.

Hasta fin de mes va tar abiertu'l mercáu, pero la competición nun espera y va haber 3 puntos en xuegu que yá nun vuelven. Enfrente va tar el Valladolid, otru equipu en construcción que va presentar un once de circunstancies, anque non faltu de calidá.

Poro, la oportunidá de sumar paez bona, pero los roxiblancos han ufrir una imaxe más asemeyada a la de los dos primeros partíos de la xira mexicana que la de los xugaos n'Asturies y Lleón. Yáñez (Málaga CF), Hassan (Villarreal B) y Róber Pier (Levante), los trés únicos refuerzos si nun contamos los cedíos, tán disponibles pa debutar col Sporting.

Na semeya, un entrenamientu del Sporting esta pretemporada nel campu númberu 1 de Mareo.