El Sporting entamó la pretemporada ensin cares nueves y con dos positivos

La temporada 21-22 echó a andar pal Sporting. Na tarde del martes celebróse’l primer entrenamientu con munchos xugadores del filial, ensin fichaxes y cola ausencia d’Álvaro Vázquez y Bogdan al dar positivu por COVID-19, nel casu del ucranianu per segunda vez.

David Gallego lidera per segundu añu una plantía na que los cambios principales son l’ausencia de Javi Fuego y Carmona, que nun tuvieron ufierta de renovación del club; de Cristian Salvador, que la refugó pa marchar al Huesca; y de Neftali Manzambi, que rescindió l’añu que-y quedaba de contratu pa firmar pol Winterthur de la Segunda suiza, amás de Saúl García y Cumic, que tornen al Alavés y al Olympiacos, de manera respeutiva, al finar les cesiones. Nun hebo entovía nenguna incorporación nuna situación económica complicada de la entidá, que va obligar a un gran trespasu pa cuadrar les cuentes.

El preparador físicu Eduardo Domínguez va ser una figura importante nestes selmanes de puesta a puntu pa la temporada, que yá tien día y hora marcada. El Sporting va recibir na primer xornada al ascendíu Burgos CF el domingu 15 d’agostu a les 17 hores.

Enantes, seis partíos amistosos, ensin Villa de Xixón nin, sorprendentemente, rivales de Primera División. Una bona oportunidá pa nueve mozos del filial que van facer la pretemporada col primer equipu: el porteru Joel Jiménez, Mecerreyes, David Argüelles, Diego Sánchez, Lucas Suárez, César Santamaría, Trabanco y David Fernández, anque éstos trés últimos dieron tamién positivu por COVID-19, polo que Gallego convocó pa estes primeres sesiones a Jordi Pola y Pelayo Pérez.

Babin, con Martinica na Copa Oro

Son baxa estos díes Babin, convocáu por Martinica pa xugar la Copa Oro; Manu García y Djurdjevic, con permisu del club; Pablo García, lesionáu, y Pelayo Morilla, entovía en procesu de recuperación. Tamién Álvaro Vázquez y Bogdan por dar positivos nes pruebes PCR feches pola vuelta al trabayu.

Semeya propiedá del Real Sporting de Gijón, SAD.