El Sporting enfrenta'l derbi cola necesidá de ganar

Rubén Baraja xuégase'l puestu esti sábadu nel derbi. El Sporting viaxa al Carlos Tartiere cola necesidá imperiosa de ganar fuera de casa y énte l'eternu rival pa dar un xiru de 180 graos na so trayeutoria y evitar mirar hacia abaxo na clasificación de Segunda.

Con Peybernes fuera por gripe, la única baxa importante nel Sporting ye la de Lod, anque'l finlandés nun acaba de carburar y el domingu col Málaga (2-2) salió dende'l bancu. Por contra, ta disponible y apunta a la titularidá el capitán Roberto Canella, que sustituirá nel once a Noblejas.

Una derrota conllevaría, salvo sorpresa mayúscula, la destitución de Baraja, que perdió munchu creitu pola imaxe que ta dando l'equipu esta temporada nel terrén de xuegu. L'afición yá se posicionó'l domingu y aclamó a José Alberto, téunicu del filial, nel tramu final del partíu.

Un puntu menos que l'Uviéu

Enfrente va tar l'Uviéu, decimosegundu clasificáu de Segunda con 16 puntos, ún más que'l Sporting, decimocuartu. Anquela, tamién cuestionáu por un sector de l'afición, pierde a Carlos Hernández pal partíu, al que nun llega Aaron Ñíguez.

Saúl Berjón, líder de los azules, paez que va tar disponible pal téunicu andaluz pa un choque que va comenzar a les 20.45 hores. Nun s'espera enllenu nel Tartiere, onde va haber dalgo menos d'un millar de sportinguistes na grada visitante por cuenta de les llacerioses condiciones impuestes por Delegación del Gobiernu estatal n'Asturies pal desplazamientu d'aficionaos.