El Sporting da'l meyor regalu de Reis a l'afición y yá espera al Cádiz

|
Falta a Djuka nel Sporting 2-1 Villarreal (6 de xineru del 2022)

Djuka y Bogdan antroxaron de reis magos y dieron el meyor regalu a l'afición del Sporting. Los de David Gallego superaron al Villarreal, campeón actual de Lliga Europa, por 2-1 remontando'l tantu inicial d'Albiol y van xugar col Cádiz nos octavos de final de Copa.

El Sporting metióse ente los diecieséis meyores equipos de la Copa llueu de derrotar al equipu de la Comunitat Valenciana, clasificáu pa octavos de final de Lliga de Campeones, onde lu espera la Juventus. El sortéu d'esta mañana na Ciudad del Fútbol de Las Rozas, nel qu'entovía s'empareyaba a los de menor categoría colos de Primera, crució a los xixoneses col equipu andaluz entrenáu por Álvaro Cervera.

Dio una imaxe diferente l'equipu qu'en Lliga énte'l Villarreal. Pensando nel partíu del domingu en Málaga (18.15 hores, La Rosaleda), David Gallego apostó por dosificar de minutos a los sos xugadores, con trés cambios al descansu, los de Pedro, Babin y Kravets, pa dar entrada a Villalba, Berrocal y Pablo García, depués d'una bona primer parte na que Bogdan tuvo la meyor ocasión nuna xugada ensayada a partir d'un saque d'esquina en curtiu.

Tamién movía bancu Emery, afeutáu poles baxes y la Copa África, sacando al internacional Gerard Moreno viendo que'l partíu podría complicase de siguir esi rumbu. Sicasí, golpiaben primero los mariellos nel 48 nun centru que rebotó en Christian Rivera, garrando altura, y nel qu'Albiol, llibre de marca, foi'l más atentu.

Djuka, clave

Los de Gallego nun baxaron los brazos llueu del gol, magar que Moreno tuvo l'empate nuna gran xugada visitante, salvada por Mariño, y el catalán pronto tiraba de Djuka pa buscar l'empate. El serbiu algamó premiu a los 5 minutos, nel 67, llueu de controlar col pechu un mal llanzamientu en llargu de Rulli, fuera de portería, y rematar de primeres ensin que cayera'l balón.

El tantu de guapa factura animó al Sporting y Emery reclutó a Parejo y Foyth. Seríen los roxiblancos los que xeneraríen ocasiones nel tramu final, hasta que nel minutu 88 un saque de puerta de Mariño acabó nun gol de Bogdan d'escelente disparu: baxóla Djuka col pechu pa Villalba, que fixo una conducción xirando sobre sí mesmu pa contautar con Aitor García y ésti col ucranianu.

2-1 nel marcador y allegría ente los xugadores y afición depués de trés meses mui malos. Los xixoneses siguen en Copa y yá esperen a un Cádiz que vien de superar al Fuenlabrada (0-1) con gol nel 93 d'Alarcón y que ta acabante de firmar a Fede San Emeterio, cedíu dende'l Valladolid.

El choque col club de Cervera va ser a partíu únicu na fin de selmana del 16, coincidiendo col parón lligueru pola Supercopa. Nel casu de superar a los andaluces, el sortéu de cuartos yá sería puru, siempre nel campu del rival d'inferior categoría.

Na semeya, Mario salta pa golpiar de cabeza nun duelu con Djuka nel que'l serbiu reclamó falta.

Contador Estadistiques