El Sporting 2023-2024 arranca en Mareo

Los de Ramírez entamaron el trabayu de pretemporada col fichaxe únicu de Yáñez.

El segundu añu de la era Orlegi en Xixón, el primeru nel que nun se pue falar de la herencia de la era Fernández, arrancó esta tarde. Depués de dos díes de reconocimientos médicos, el Sporting 2023-2024 echó les primeres carreres nel campu númberu 1, onde va trabayar una selmana, yá que'l miércoles viniente l'equipu va viaxar a México a facer bona parte de la preparación.

Foi'l 'Cali' Izquierdoz el primeru en saltar al prau, onde esperaben los participantes nel Campus de Mareo. Como testigu, el numberosu públicu que s'averó a ver a los xugadores magar la falta de fichaxes, siendo la única cara nueva la de Rubén Yáñez, porteru procedente del Málaga CF que va disputar la titularidá con Christian Joel, que tornar llueu de la so cesión al Celta B.

Llueu de trabayu físicu na zona del campu más próxima a la grada, los xugadores protagonizaron dellos exercicios con balón. Nun s'exercitaron Milovanovic, pendiente de la so salida a préstamu, y Zarfino y Valentín, con molesties.

La primer oportunidá pa ver a los de Miguel Ángel Ramírez n'aición va ser el día 16 en Torreón contra Santos. La vuelta de México, onde tamién van xugar contra Atlas y el Club Atlético La Paz, ta previsto pal 25.

Na semeya, dos aficionaos mozos observen a los futbolistes, con Yáñez, a la derecha de verde.