El Sporting 2022/2023 va contar con siete baxes

Va tratase la continuidá de Jony y Berrocal podría interesar, mentes que Borja López y Pablo Pérez cuenten con oferta de renovación.

Son nueve los futbolistes qu'acaben contratu o cesión col Sporting, que'l domingu dio portazu a la so peor temporada en númberos al acabar nel puestu 17 con 46 puntos, empeorando'l 13, el más baxu rexistráu hasta agora na so historia, pero siete podríen ser les baxes definitives. Unes salíes que va aprovechar Abelardo pa dar un llaváu de cara a un equipu que pasó de liderar la tabla na xornada 10 a cortexar col descensu.

Van dexar la disciplina roxiblanca Marc Valiente, Babin y Bertín, mentes que tornen a los sos equipos Kravets, el Puma Rodríguez, Calavera y Eric Ramírez. Tamién tien contratu con otros conxuntos Jony, que va tratar de rescindir cola Lazio pa firmar un contratu nuevu col Sporting, y Berrocal, propiedá del Sevilla, que podría interesar nel casu de rebaxar les pretensiones económiques del club andaluz o pautar una cesión nueva.

Acaben tamién pero cuenten con ufierta de renovación Borja López y Pablo Pérez, al igual que Djurdjevic, que tien firmao hasta'l 2023. Mentes, poseen contratu y nun paecen contar p'Abelardo el delanteru Campuzano y el centrocampista Nacho Méndez, y podría salir trespasáu depués de pagar la opción del compra al Birmingham City el mediapunta Villalba.

Cuatro cedíos de vuelta

Otra posible venta pue ser la de Manu García depués de la so cesión en Primera nel Alavés. Tornen tamién depués d'un préstamu Pelayo Suárez (UD Logroñés), Pelayo Morilla (Algeciras) y Christian Joel (AEK Larnaca).

Los trés nun tienen segura la so continuidá, al igual que Bogdan, con contratu hasta'l 2024, situación que se va valorar estos díes.