El Solarón ve'l so futuru un poco más verde

L'apuesta de l'alcaldesa Carmen Moriyón por reducir la edificación nos terrenos qu'agora son parque nun ye descartada por Adrián Barbón.

La demanda vecinal de convertir el nomáu Solarón nel gran pulmón del centru de la villa, que la presidenta de Foro Asturias yá defendiera en campaña eleutoral, ta más cerca de verse satisfecha. O al menos en parte.

El martes aconceyaron en Presidencia del Gobiernu, n'Uviéu, Moriyón y Barbón pa falar sobre los principales proyeutos en materia d'infraestructures que tán en marcha nel conceyu. Na mesma la primer edil treslladó'l so deséu de modificar el plan urbanísticu de la zona pa reducir la edificabilidá pa dedicar la mayor superficie posible a parque.

Nun hebo negativa del socialista al respeuto, que prometió estudiar les posibilidaes d'una operación que basa la so financiación nes plusvalíes pola urbanización de los terrenos lliberaos pol Plan de Víes. Al día siguiente, el conseyeru d'Ordenación del Territoriu, Urbanismu, Vivienda y Derechos Ciudadanos, Ovidio Zapico, de Convocatoria por Asturies, afirmaba na so intervención na Comisión de la Xunta Xeneral pa presentar la so aición de gobiernu la so predisposición pa que'l futuru del Solarón sía verde.