El sol anima l’afluencia de xente a una Feria del Libro de Xixón de récor

La séptima edición de la Feria del Libro de Xixón (FeLiX) arrancó esti xueves con una gran presencia de públicu peles 70 casetes instalaes en Begoña y na cai Francisco Tomás y Valiente, la cifra más alta d’estos años. El sol qu’acompañó la primer xornada ayudó a esta gran afluencia, que s’espera mayor el vienres, sábadu y domingu.

La gran fiesta lliteraria na puerta del branu xixonés gana pesu añu a añu, como amuesa la participación d’editoriales y llibreríes, asina como’l bon índiz de venta. Nesta edición hai 13 casetes más que l'añu pasáu, cuando s'instalaron 57, ocupaes por 27 llibreríes y 43 editoriales, entes les qu’hai delles qu’asoleyen títulos n’asturianu, como La Fabriquina, Trabe, Camelot, La Cruz de Grado, KRK, Delallama, Hoja de Lata, Pintar-pintar, Picu Urriellu, Trea, Impronta o Cuatro Gotas y Radagast, que comparten espaciu.

Begoña ocupa la mayor parte de los puestos, asina como les dos carpes qu’acueyen les 77 actividaes programes na FeLiX, como presentaciones o alderiques, que tamién tienen güecu nel patiu del Centru de Cultura Antiguu Institutu y de la Escuela de Comercio. La llingua asturiana tien presencia nun bon númberu d’elles.

El primer día de les cuatro que conformen esta feria desedolcóse con un gran ambiente, ayudáu pol bon tiempu. Rescampló la espectación que llevantó l’autora Alice Kellen, que participó a les 19 hores nel alderique ‘El corazón del New Adult’, axuntando a un públicu mui mozu, con persones faciendo filera na puerta dende la mañana.

Horarios

L'horariu d'apertura de la FeLiX ye de 11 a 14.30 y de 17 a 21.30 hores, de güei al sábadu, y de 11 a 14.30 y de 17 a 20 hores, el domingu. Tolos títulos a la venta tienen un 10 por cientu de descuentu nel preciu nos 70 puestos instalaos.

Na semeya, ambiente esta tarde en Francisco Tomás y Valiente.