El PSOE foi'l partíu más votáu nes eleiciones estatales del 28-A

Con un 33 por cientu del total de votos, el PSOE resultó'l partíu con más apoyos nes eleiciones del 28-A, mesmu resultáu que se dio a nivel nacional y estatal. La gran sorpresa de la xornada foi'l descensu de PP-Foro, que pasa a ser la cuarta fuercia nel conceyu.

La candidatura encabezada, al igual que nel 2016, por Adriana Lastra medró casi diez puntos dende la cita eleutoral última, al pasar d'un 23,94 por cientu a un 33 al sumar casi 18.000 votos más. Pela so parte, la coalición PP-Foro cai d'un 32,45 por cientu a un 15,79 por cientu, casi 25.000 sofitos menos.

La segunda fuercia nel conceyu sigue siendo Xuníes Podemos que, sicasí, retrocede d'un 25,89 por cientu a un 18,01 por cientu. Darreú ta Ciudadanos, que medra d'un 14,16 por cientu a un 17,78 por cientu.

Toos estos partíos sumaron un escañu por Asturies nel Congresu, cola esceición del PSOE, qu'algama 3. El diputáu restante ye pa VOX, formación qu'entra na Cámara Baxa y que suma 19.000 votos (11,64 por cientu) cuando nel 2016 nun llegó nin a 500 (0,28 por cientu).

La primer fuercia estraparllamentaria nel conceyu sigue siendo'l Partido Animalista contra el Maltrato Animal (PACMA), que vive un pequeñu aumentu de 200 votos (del 1,23 al 1,29 por cientu). Andecha Astur, la única formación asturiana que participó en solitariu nes Estatales, rexistró 247 votos (0,15 por cientu).