El programa ‘Esparciendo Cultura’ presenta 29 actividaes, nenguna n’asturianu

La propuesta nueva d’ociu cultural y educativu dirixida a neños y neñes de 4 a 12 años, ‘Esparciendo Cultura por Xixón’, presenta 29 actividaes a celebrar ente payares y avientu, nenguna d’elles n’asturianu. Esta iniciativa entámase llueu de la polémica creada por una supuesta imposición del idioma pola celebración d’un cuentacuentos nel Botánicu.

Trátabase de ‘La bruxa del Botánicu’, desendolcada con motivu de la ponte festiva por Difuntos, la única de les cuatro programaes pol recintu municipal que nun fora en castellanu. Les quexes por esta actividá, sicasí, nun tardó en saltar a les redes sociales y inclusive a medios estatales como escusa p'atacar l'asturianu y torgar el procesu abiertu pal reconocimientu de los derechos de los sos falantes, pera la realidá ye que nel Xardín Botánicu Atlánticu nun se cumple col Plan de Normalización –nin el vixente nin l’anterior– y que de les 34 programaes pa lo que quedaba d’añu nenguna yera n’asturianu.

‘Esparciendo Cultura por Xixón’, entamada pola Fundación Municipal de Cultura, Educación y Universidá Popular, sigue’l mesmu camín: les 29 propuestes son en castellanu. La llingua asturiana nun tien presencia, polo qu’agora sí resulta imposible falar d’imposición del idioma llariegu nes actividaes infantiles entamaes pol Conceyu.