El pozu de tormentes del Parque Inglés podría entrar en funcionamientu en setiembre

La obra faraónica del pozu de tormentes del Parque Inglés –anguaño Hermanos Castro– encara yá’l so tramu final cuando se van cumplir dos años dende’l so entamu. La idea ye que tea finada dafechu n’ochobre, anque en setiembre yá podría tar activa la instalación si se dieren bastiazos nesa época.

Los trabayos, qu’arrancaron en febreru del 2019 y que tamién se desendolcaron na avenida d’El Molinón pa coneutar colectores, van permitir que les agües que van a la mar n’episodios de tormentes puedan ser trataos previamente. Asina, van almacenase nel depósitu qu’agora mesmu ta afondándose una vegada afitada la estructura nun terrén inestable, pa depués bombiala poco a poco a la depuradora d’El Pisón.

Con 10 metros de fondura, de los que se lleven escavaos 3,5 metros, la so capacidá va ser de 15.000 metros cúbicos, dalgo más pequeñu del de L’Arbeyal, tamién en marcha. L’alcaldesa Ana González acudió ayeri a presenciar la evolución d’una obra na que se lleven invertíos 11 millones d’euros.