El Plan de Movilidá Sostenible sal alantre cola totalidá de los votos de los conceyales del PSOE

El Plenu d’abril aprobó’l Plan de Movilidá Sostenible 2023-2023 y el Reglamentu de Laicidá. La vista taba puesta nel primeru, poles diferencies nel PSOE llocal con respeuto a esti documentu non normativu, pero finalmente los ediles que se posicionen a favor de la Executiva actual del partíu votaron a favor de la propuesta.

L’alcaldesa Ana González Rodríguez, que se despidió de los conceyales magar que, según apuntó, ta previsto un Plenu estraordinariu enantes del final de la llexislatura, pudo aprobar el plan que busca ameyorar la calidá de vida de la ciudadanía con delles intervenciones que dan protagonismu al peatón y la bicicleta en detrimentu de los vehículos a motor, un testu non normativu impulsáu por Aurelio Martín, conceyal de Mediu Ambiente y Movilidá, únicu d’Asturies pela Izquierda (IX-IAS). Podemos-EQUO tamién sofitó esta iniciativa que contó cola oposición del restu de grupos.

Tamién se votó’l Reglamentu d’Aconfesionalidá o Laicidá del Conceyu, qu’impide la participación institucional n’actos relixosos, con mesmu resultáu. Ésti vieno con una enmienda del propiu equipu de gobiernu municipal pa dexar claro que nun impón “llendes, derechos nin obligaciones” a ciudadanos y conceyales, sinón que “regula comportamientos de la institución”, esplicó la edil de Facienda, Organización Municipal y Personal, Marina Pineda.