El Martes d'Antroxu y San Pedro caltiénense como festivos nel 2021

La Conseyería d'Industria, Emplegu y Promoción Económica confirmó les fiestes llocales de tolos conceyos del país.

El 16 de febreru, fecha nel que cai'l Martes d'Antroxu l'añu qu'entra, y el 29 de xunu, San Pedro, van ser los festivos llocales de Xixón nel 2021. El primeru celebra una de les fiestes de más tradición de la cultura asturiana, mentes que la segunda festexa al patrón de la villa.

Son les dos xornaes qu'escoyó l'Ayuntamientu pa los festivos llocales del 2021, que'l Gobiernu confirmó ayeri nel BOPA xunto colos del restu de conceyos asturianos. D'esta forma nun hai cambios con respeuto a años anteriores –Podemos-EQUO propunxo camudar San Pedro por San Xuan (24 de xunu)–, anque nel pasáu San Antoniu (13 de xunu) y San Miguel (29 de setiembre) yeren festivos.

Na imaxe, la ilesia de San Pedro y Campu Valdés, onde'l 29 de xunu tien llugar la bendición de les agües.