El fútbol xixonés va siguir paráu tres la suspensión de les competiciones

La RFEF y LaLiga oficializaron esta midida pal fútbol profesional y amateur, anque dambos organismos pretenden finar la temporada.

Depués d'aplazar dos xornaes en Primera y Segunda División, la d'esta fin de selmana pasada y l'anterior, esta mañana la Comisión de Siguimientu prevista nel Conveniu de Coordinación RFEF-LaLiga vixente decidió "la suspensión de les competiciones profesionales de fútbol hasta que les autoridaes competentes del Gobiernu d'España y de l'Alministración Xeneral del Estáu consideren que se pueden reanudar y ello no suponga riesgu nengún pa la salú". D'igual forma, l'órganu federativu facía lo propio coles non profesional y d'ámbitu estatal, esto ye la Segunda División B y la Tercera División, a la que va siguir la Real Federación de Fútbol del Principáu d'Asturies col restu de categoríes.

D'esta forma, el Sporting y el so filial, l'UD Gijón Industrial y l'UC Ceares, que lleven una selmana cola actividá parada, van siguir ensin entrenamientos polo menos hasta'l 12 d'abril, fecha que mañana marcará l'Executivu pa prorrogar l'estáu d'alarma pola COVID-19. El derbi asturianu de Primera, previstu nun primer momentu pa esti domingu a les 21 hores n'El Molinón, ye ún de los partíos afeutaos que tendrán qu'acomodase nun calendariu nuevu nel casu de que se reanude la competición, como se pretende.

Na semeya, un momentu del derbi xixonés de Tercera ente'l Ciares y l'Indus celebráu'l día 7 nel campu de Lloreda, que finó con empate a dos goles.