El fútbol base del Sporting va pasar la temporada en blanco

|
Fernando Losada

El club decide nun apuntar a los sos equipos de categoría cadete p'abaxo nes competiciones qu'entama la Federación no que queda de temporada tres el permisu del Gobiernu.

"La única motivación ye la salú", aseguró'l conseyeru Fernando Losada nuna rueda de prensa acompañáu de los responsables de los servicios médicos, Antonio Maestro y Gonzalo Revuelta. "Ye una decisión que nun ye fácil, porque lo fácil sería lo contraria, pero sí entendemos que ye la correuta y la responsable", aseguró.

Nestos momentos namái 7 equipos de la estructura del Sporting tán activos: el primer equipu, el filial, los dos xuveniles y los trés femeninos. De cadetes p'abaxo la competición taba parada, permitiéndose namái los entrenamientos, pero en Mareo decidiérase nun entamalos pa garantizar la seguridá de tolos conxuntos, convirtiendo les instalaciones nuna burbuya, ensin contautos ente les diferentes plantíes, con especial proteición al de Segunda División daos los esixentes protocolos de LaLiga.

La situación va siguir igual tres esta decisión del club tomada xunto colos servicios médicos magar el cambiu de posición del Gobiernu no que respeuta a la competición nel deporte base y escolar. Otra manera, Losada apuntó que "la secretaría teúnica del Uviéu se punxo en contauto cola secretaría téunica del Sporting" pa confirmar que nun recibieran nengún ofrecimientu de xugadores de Mareo dada la paralización de l'actividá nel fútbol base roxiblancu.

Na semeya, Losada.

Contador Estadistiques