El 'Elogio del Horizonte': 30 años de la obra de Chillida que se convirtió en símbolu de Xixón

El 9 de xunu del 1990 inaugurábase’l ‘Elogio del Horizonte’, obra encargada pol Conceyu a Eduardo Chillida pa coronar la recuperación de L’Atalaya pa la ciudá d'un terrén propiedá del Exércitu hasta pocos años enantes. Criticada de primeres por parte de la ciudadanía, sobre manera pol so costu altu, acabó convirtiéndose nun símbolu.

El Conceyu mercara nel 1982 al Ministeriu de Defensa’l cerru, que cediera nel 1931 el Gobiernu de la República pa ocupalu l’Exércitu na Guerra Civil, por 25 millones nuna operación de 175 qu’incluyía tamién el cuartel d’El Coto. D’esta forma, el Conceyu quería recuperar esta zona pa la ciudadanía.

Fíxose un plan pa L’Atalaya que l’arquiteutu Paco Pol quixo coronar con una gran escultura, pensando pa ello nun artista de la talla de Chillida. Con Vicente Álvarez Areces d’alcalde comenzaron los contautos y el vascu propunxo una idea que taba desendolcando pa poner na mariña, nun primer momentu en Francia, qu’encaxaba nes posibilidaes del cerru.

Asina, Chillida desendolcó’l ‘Elogio del horizonte’, figura de formigón de 10 metros d’altor y 500 tonelaes que tuvo un costu de 100 millones de pesetes, de los que 5 foron pal artista. Foi mui criticáu de primeres por parte de la ciudadanía al consideralo un marafundiu y nun prestar muncho la so forma, llegando a recibir el nome popular de ‘váter de King Kong’.

Sicasí, col pasu de los años, la escultura convirtióse nun símbolu de Xixón y una de les visites obligada de los turistes. Tamién apaez nos llibros d’arte de tol mundu como ún de les obres de referecia de Chillida, autor que finó nel 2002.

Actividaes pa conmemorar la fecha

El Conceyu aprovecha la conmemoración de los 30 años de la so inauguración pa entamar delles actividaes. Estrenó na so web y en redes sociales el videu ‘El Elogio del Horizonte’ y na so redolada instaló catorce paneles informativos sobre la obra, que conformen la esposición 'Elogio del Horizonte, mirando al futuru' que se va poder visitar hasta’l 1 de setiembre.