El concursu de rellatos curtios pa xente mozo 'Qué guapo ye querese' yá tien ganadores
|
3 Xineru, 2018 por Redacción
El Conseyu de Mocedá de Xixón y la Oficina de Normalización Llingüística entamaron esti concursu lliterariu destináu a xente mozo.
Convocáu con motivu del Día Européu de les Llingües pa fomentar l’usu del asturianu ente la mocedá y l’emplegu del mesmu pa falar de too tipu de materies, amás de p'averar la lliteratura a la xente mozo y fomentar un bon querer hacia l’idioma o les persones, alloñáu nesti casu últimu del amor románticu tan enraigonáu na nuesa sociedá, el I 'Qué guapo ye querese' taba dividíu en dos estayes. Na correspondiente al rangu d'edá comprendíu ente los 19 y 25 años, la ganadora foi Alba Carballo, con 'Desnudu nel sable', mentes que Claudia Gutiérrez Lueje, con 'El dolor caltria', y Borja Riestra, con 'La entruga', llevaron el segundu y tercer premiu, de manera respeutiva.
Na estaya de 16 a 18 años resultó vencedor Pablo Cueto con 'L'amor tamién madruga', quedando segundu Daniel Fernández Rodríguez, con 'Alborecer'. El tercer premiu quedó ermu.
El xuráu d'esta primer eidción de 'Qué guapo ye querese' tuvo compuestu por Vicente García Oliva, escritor asturianu miembru de l'Academia de la Llingua Asturiana y direutor de la coleición Lliteratura Xuvenil de la mesma institución; Álvaro Granda, presidente del Conseyu de Mocedá de Xixón; y María Xosé Rodríguez López, responsable de la Oficina de Normalización Llingüística, qu'actuó como secretaria. Los ganadores van recibir el 21 de febreru próximu, Día Internacional de la Llingua Materna, un ordenador portátil, mentes que la recompensa pa los segundos ye una tableta y, pal terceru, un llibru electrónicu.
