El Conceyu recuerda con una placa a les víctimes de la represión fascista

Esti martes va colocase una placa conmemorativa de la Memoria Histórica nel Centru de Cultura Antiguu Institutu. D’esta forma el Conceyu de Xixón quier recordar a toles víctimes de la represión fascista nun edificiu qu’acoyó xuicios de rebelión militar.

Según detalla l’Ayuntamientu nun comunicáu, la placa sitúase en “reconocimientu a toes aquelles persones que sufrieron la represión por defender les sos idees polítiques a partir del golpe d’Estáu qu’acabó cola Republica y que desencadenó trés años de Guerra Civil”. L’actu va celebrase a les 19 hores nel Centru de Cultura Antiguu Institutu, llugar escoyíu pol simbolismu que tien esta instalación.

“L’Antiguu Institutu Xovellanos yera la sede de la Guardia d’Asaltu nel 1936. Al aniciase la guerra, esti cuerpu púnxose del llau de la República na mayoría de ciudaes. Por eso mientes los bombardeos la mayor parte de les víctimes produxéronse nes inmediaciones d’esti edificiu”, espliquen. Amás, nes sos sales celebráronse xuicios contra munchos xixoneses acusaos de rebelión militar, “xucios ensin garantíes que se solventaban de forma rápida condenando a los acusaos, que, ensin más opciones, yeren treslladaos a la cárcel d’El Coto a la espera de la execución de la sentencia”, qu’en munchos casos yera de muerte.