El Conceyu decide prorrogar los presupuestos municipales actuales polos efeutos de la COVID-19

Xixón nun va tener presupuestos nel añu 2021. L’equipu de gobiernu municipal decidió prorrogar los actuales pola disminución de los ingresos corrientes y l’aumentu de los gastos pola COVID-19 “que faen imposible cuadrar les cuentes”, esplicó la conceyala de Facienda, Organización Municipal y Personal, Marina Pineda.

La socialista defendió esta mañana qu’ésta yera la meyor opción. Los datos que manexa’l Conceyu cifren en 8 millones la perda d’ingresos y nuna cantidá mui asemeyada la de gastos, polo que l’apuesta ye prorrogar les cuentes actuales.

Esta situación va impedir inversiones nueves, anque non la continuidá de les yá contrataes. Les formaciones de dereches de la oposición criticaron con dureza esti pasu dau pol gobiernu municipal de PSOE y Xixón pela Izquierda (IX-IAS), mentes que Podemos-EQUO señaló que preferiría negociar unos presupuestos nuevos.