El Conceyu camuda’l procesu p’algamar permisu d’accesu nocherniegu con vehículu a Cimavilla

Cola intención de facilitar la xestión del permisu p’acceder a Cimavilla pela nueche con vehículu, el Conceyu de Xixón ta acabante de camudar el procesu. Agora ye más simple, yá que l’autorización alministrativa sustitúise por una declaración responsable.

El tráficu al barriu de Cimavilla ente les 21 y les 7 hores caltiénse dende hai años restrinxíu a vecinos y a los vehículos qu’acceden al parking construyíu baxo L’Atalaya, con accesu videovixiláu dende’l 2015. Agora los residentes y persones que guarden el so coche en dalgún de los garaxes de la zona van ver facilitaos los trámites pa poder algamar el permisu d’accesu.

Dende’l día 4 val con presentar una declaración responsable, por parte de la persona interesada, mediante la presentación d’un formulariu. Asina de manera inmediata’l vecín recibe un documentu que sirve p’acceder a Cimavilla.

Tampoco nun va ser necesario renovar añu a añu, yá que la declaración responsable permite allargalu hasta 5 años, lo que provoca una reducción importante de trabayu alministrativu pal Conceyu y un aforru de costos calculáu en 62.000 euros añales. Ésta pue presentase nes oficines d’Atención a la Ciudadanía.

Na semeya, accesu al barriu pela plaza'l Marqués, xunto al Palaciu de Revillagigedo.