Delles pintaes neonazis en Ciares y El Llano indignen a vecinos y lleven a aprobar una declaración institucional de condena

Tolos grupos municipales, cola esceición única de VOX, sofitaron la declaración institucional de condena a les pintaes ultraderechistes con amenaces y insultos apaecíes estos díes atrás nun chigre –en dos ocasiones– y nun centru evanxélicu de Ciares, y nun portal d’El Llano. Los vecinos sofiten y solidarícense coles persones afeutaes.

Cola escusa de que la condena queda curtia y nun inclúi’l refugu a otru tipu d’amenaces, VOX quedó solu na intolerancia nel Plenu d’esta mañana. El restu de fuercies polítiques con representación nel Conceyu aprobó la declaración institucional que reprueba les pintaes neonazis apaecíes nos díes últimos nos barrios de Ciares y d’El Llano.

La primera foi nel Sorelle, restorán de comida colombiana y ecuatoriana asitiáu na cai Feijoo nel tramu que pasa per Ciares. Amanecía’l xueves con pintaes de ‘Latinos no’ acompañaos d’esvástiques y símbolos que faen referencia a Adolf Hitler. Nun sería la única, yá que la mañana del llunes apaecía la persiana d’esti establecimientu con amenaces de muerte y una esvástica a una persona ayena a los propietarios.

Tamién se pintaba col mesmu mensaxe un portal de Juan Alvargonzález, n’El Llano, y con consignes contra los xudíos nun llocal d’Alfonso Camín, en Ciares, nel que ta acabante d’abrir un centru evanxélicu. Toes elles, refugaes polos vecinos, que nun duldaron n’amosar la so solidaridá colos afeutaos y llamar al consumu nel Sorelle, tán siendo investigaes pola Policía.

Otra manera, nel mesmu Plenu, tamién s’aprobó, col refugu de VOX, una declaración institucional d’apoyu al pueblu afganu llueu de la victoria talibán.

Na semeya, segunda pintada apecida'l llunes nel restorán Sorelle de Ciares.