Conferencia d'Ástura, con Suárez Puente

Esti martes Ástura organiza una conferencia entitulada 'De cáncer, xenomes y sidrón', a cargo de Xosé Antón Suárez Puente.

El cáncer ye una enfermedá producía pola arrexuntanza de mutaciones nel xenoma. Poro, pa poder lluchar escontra esta malura, ye necesario conocer cuáles son les alteraciones del xenoma que faen qu’una célula sana se tresforme nuna célula tumoral. La secuenciación del xenoma d’un cáncanu ufierta la posibilidá de conocer tolos cambios importantes pa esti procesu, abriendo nueves víes pal diagnósticu, siguimientu y desendolcu de nueves terapies pa los pacientes oncolóxicos.

Xosé Antón Suárez Puente ye Profesor Titular de Bioquímica y Bioloxía Molecular na Universidá d’Uviéu, y miembru del Institutu Universitariu d’Oncoloxía (IUOPA). A lo llargo la so carrera vien estudiando’l cáncer mediante la identificación de nuevos xenes humanos implicaos nesa malura. Como investigador del Scripps Research Institute de California, ente los años 1999 y 2002, estudió los mecanismos moleculares polos que los cáncanos son a facer qu’espoxiguen nuevos vasos sanguíneos pa llevar alimentu y oxíxenu a les célules tumorales. Ya de vuelta n’Asturies, dende l’añu 2002 vien peñerando’l xenoma humanu y el d’otres especies pa pescanciar los mecanismos implicaos nel desendolcu d’un cáncanu, y nel añu 2011, l’equipu del Dr. Carlos López Otín, al que pertenez, foi’l primer grupu español en secuenciar un xenoma humanu, y el primeru del mundu en secuenciar el xenoma de 4 tumores.

Anguaño tán acabantes de completar la secuenciación de más de 500 xenomes del cáncer, y d’otres enfermedaes como cáncer de mamiella familiar, síndromes d’avieyamientu o miocardiopatíes. Estes investigaciones, llevaes a cabu dende l’Institutu d’Oncoloxía de la Universidá d’Uviéu, tán revolucionando’l nuesu conocimientu del cáncer, y creando, dende Asturies, parte de lo que sedrá la medicina del futuru. El Dr. Puente ye autor de más de 80 publicaciones en dalgunes de les revistes de mayor prestixu, incluyendo numberosos artículos en 'Nature', 'Nature Genetics' o 'Blood', y ye autor de varios llibros científicos o de divulgación en llingua asturiana.

Los sos trabayos tienen una enorme repercusión, siendo citaos más de 11.000 vegaes, lo qu’amuesa la relevancia de les investigaciones llevaes a cabu dende esta pequeña universidá de nueso. Amás de la so actividá como investigador, ye profesor de Bioquímica nos Graos de Bioloxía y de Química, y ye Coordinador del Máster en Biomedicina y Oncoloxía Molecular nel que se formen les futures xeneraciones d’investigadores nestes materies.

Esta actividá ta dientro de la collaboración entre l'Atenéu Obreru de Xixón (cai Cuadonga, 7) y d'Ástura, pa facer una actividá mensual al rodiu de la cultura asturiana. La cita va ser mañana, a les 20 hores, con entrada llibre.