Conferencia 'Asturies y el so modelu d'oficialidá: les llingües como bien común',

L'actividá mensual de l'Asociación Cultural Ástura nel Atenéu Obreru de Xixón treslládase al vienres 18 pa poder contar col doctor en Derechu y lletráu del Tribunal Constitucional José Manuel Pérez Fernández.

El tercer martes del mes ye la fecha acutada pa la celebración de les charres mensuales sobre cultura asturiana d'Ástura, pero nesta ocasión la cita va pasar al vienres. La razón ye'l deséu del coleutivu de tratar un tema mui d'actualidá nestos tiempos últimos, como ye'l de modelu d'oficialidá que necesita Asturies, y pa ello contar con un espertu de la talla de José Manuel Pérez Fernández.

Baxo'l nome de 'Asturies y el so modelu d'oficialidá: les llingües como bien común', el tamién profesor de Derechu Alministrativu de la Universidá d'Uviéu va "esclariar conceutos –llingua oficial, llingua común, llingua propia...–, afitar les consecuencies mínimes que remaneceríen d’una declaración d’oficialidá, y amosar que nun esiste un modelu únicu d’oficialidá", espliquen dende Ástura. "Los asturianos y asturianes tenemos que ser quién a diseñar un modelu de convivencia llingüística que garantice la igualación de derechos, al ritmu que pida la mesma sociedá, pero con un compromisu seriu y continuu de los poderes públicos p’algamar esa igualación. La normalización de la situación xurídica del asturianu y del gallego-asturiano nun ye una batalla escontra’l castellán y los sos falantes, sinón que ye una llucha frente a la irracionalidá que quita a dellos ciudadanos y ciudadanes de los sos derechos llingüísticos. Tenemos el retu d’atopar un modelu de convivencia llingüísticu-social que dea cabida a toos; el nuesu modelu, l’asturianu, el de la nuesa casa común", añaden.

La cita va ser a les 19.30 hores na llar social del Atenéu Obreru de Xixón (Cuadonga, 7), con entrada llibre. Va presentar l'actu Amadéu Benavente.