Competición declara zarrar el Fondu Mozu d'El Molinón un partíu por soníos racistes

El Comité de Competición decidió imponer un castigu exemplarizante al Sporting y va zarrar el Fondu Mozu d'El Molinón, onde s'ubica la peña Ultra Boys, polos soníos racistes contra'l xugador Iñaki Williams nel choque contra l'Athletic Club qu'abrió la Lliga. El club xixonés va recurrir la sanción "en defensa de los sos derechos y de los sos abonaos".

L'árbitru Clos Gómez decidió parar el partíu nel minutu 22 del partíu celebráu'l 21 d'agostu ente los clubes asturianu y vascu, cuando una minoría de los siguidores asitiaos nel Fondu Mozu d'El Molinón emitió'l soníu carauterísticu del monu de manera despeutiva col xugador de color del Athletic Club tres una llance del xuegu. Darréu acudió a la banda p'avisar a Mario Cotelo, delegáu del Sporting, pa que se diera l'anunciu por megafonía de que nun diba permitir tales actitúes.

Agora'l colexáu tien un plazu de cinco díes pa indicar qué seutor de la grada foi onde salieron esos soníos de calter racista pa proceder al zarru d'esa zona mientres un partíu, dalgo que nun sienta mui bien nel club xixonés. "El Conseyu d'Alministración del Real Sporting espresa mediante'l presente comunicáu la so más absoluta disconformidá cola Resolución dictada, por entender que nun ye axustada a derechu, inxusta y desproporcionada, como se pondrá de manifiesto nel Recursu que s'interpondrá énte'l Comité d'Apelación de la propia Federación Española de Fútbol", afirma en dicha nota oficial.

Los argumentos espresaos ye que'l Sporting cumplió con toles sos obligaciones y adoptó toles midíes qu'obliga la llei y afirma que "va agotar la vía alministrativa en defensa de los sos derechos y el de los sos abonaos. Casu de nun ser revocada por esta vía la sanción impuesta, dexa anunciáu, dende esti mesmu momentu, qu'acudirá a la xurisdicción contenciosa-alministrativa hasta consiguir dexar ensin efeutu la Resolución dictada".

Una midida, la del club xixonés, que nun va al fondu la cuestión, que ye la presencia de simboloxía ultraderechista y xenófoba en dichu Fondu Mozu, como yá denunció en delles ocasiones Xixón Sí Puede o Izquierda Xunida (IX).

Precedente na 'navaya del Numancia'

Ésta será la segunda vegada qu'El Molinón sufre un castigu d'esti calter. L'anterior foi un zarru total del campu na temporada 2002-2003 tres los incidentes vivíos nuna visita del Numancia.

Naquella ocasión, el supuestu llanzamientu d'una navaya al campu que nunca se probó que viniera de la grada provocó una sanción que llevó al Sporting a xugar un intrascendente partíu col Almería nel Antonio Amilivia de Lleón que finó nun empate a dos goles énte unos diez mil espectadores desplazaos dende Asturies.