Cimavilla acoyerá esta añu al Festival Arcu Atlánticu
|
2 Xunu, 2017 por Redacción
Nesta ocasión va durar 6 díes, del 25 al 30 de xunetu.
La xunta rectora de la Fundación Municipal de Cultura, Educación y Universidá Popular aprobó esti xueves la propuesta y programa de la edición d'esti añu del festival colos votos a favor de Foro, Xixón si Puede y PP; mentantu que PSOE, IX y C's astuviéronse.
El presupuestu del certame xixonés va vese tamién amenorgáu (174.000 euros, 20.000 menos que nel 2016) y, nesta ocasión, el festival nun va tar dedicáu a nengún país, sinón a les llingües minoritaries del arcu atlánticu. Asina, va haber xornaes dedicaes al asturianu y al mirandés, al gallegu, al eusquera, al occitanu y al bretón.
La gran novedá ye que’l certame dexa El Muelle y pasa a repartise pel Campu Valdés y les places de Cimavilla. Tampoco nun va haber Arcu Lliterariu, actividá que dende la primer edición venía entamada l’Asociación Cultural L’Arribada.
Nel terrén musical, tán previstes les actuaciones de Dixebra, Felpeyu, Corquiéu, los gallegos Xabier Díaz y Adufeiras de Salitre o los bretones An Tri DipoP na Plaza Mayor. A éstos hai que sumar otros munchos conciertos nel Centru de Cultura Antiguu Institutu.
